Disa foto të bëra publike tregojnë ngjashmërinë e jashtëzakonshme të Kristen Stewart me Lady Dianën, në filmin e ardhshëm “Spencer”. Aktorja e “Twilight” zbuloi në qershor se do të interpretojë princeshën e ndjerë në film, i cili do të përshkruajë jetën e saj në fillim të viteve ’90, kur Diana vendosi t’i jepte fund martesës me Princin Charles.
Kristen duket e pabesueshme ndërsa vështron nga dritarja e veshur me një pallto të kuqe dhe kapele të zezë, të ngjashme me atë të Lady Dianës. Filmi nuk do të prekë vdekjen tragjike të Diana-s, por do të përqendrohet në martesën e saj me Charles dhe dashurinë që kishte për fëmijët Princ William dhe Harry.
Regjisori Pablo Larraín u shpreh:”Ne vendosëm të futemi në një histori rreth identitetit dhe rreth asaj se si një grua vendosi të mos jetë më mbretëresha..Ajo është një grua që, gjatë rrugëtimit të filmit, vendos dhe kupton se dëshiron të jetë gruaja që ishte para se të takonte Charles.”
Kujtojmë që Stewart u përball me një sërë kritikash në rrjete sociale, nga përdoruesit që shpreheshin se nuk ishte e denjë për të interpretuar princeshën. Regjisori mbrojti vendimin e tij duke thënë: “Kristen është një ndër aktoret më të mira sot. Mund të jetë shumë gjëra, por mund të jetë shumë misterioze, e brishtë dhe e fortë, kjo është ajo që na duhet.” /abcnews.al
