Një kompani në San Francisko ka gjetur një zgjidhje që iu vjen në ndihmë prindërve që kanë fëmijë të vegjël pa qenë nevoja të zgjohen vazhdimisht gjatë natës. Kompania ka krijuar një lloj të veçantë krevati, i quajtur “Cradlewise’, i cili është i pajisur me sensorë lëvizjeje dhe mikrofonë për të kuptuar nëse fëmija është në gjumë apo jo.
Ata mund ta përdorin krevatin përmes një aplikacioni në telefon, që iu jep mundësinë ta kontrollojnë fëmijën nga distanca nëpërmjet videove. Aplikacioni gjithashtu regjistron reagimet dhe lëvizjet e foshnjës gjatë natës, në mënyrë që prindërit të mund t’i shqyrtojnë më vonë në mëngjes, shkruan abcnews.al.
Nëpërmjet sistemit të veçantë që ka krevati, prindërit gjithashtu mund të programojnë tinguj të ndryshëm, që mendojnë se ndikojnë tek fëmijët për t’i vënë përsëri në gjumë. Me kalimin e kohës, sistemi inteligjent i “Cradlewise” mëson zakonet e fëmijës gjatë gjumit, duke përshtatur lëvizjet në bazë të kohës kur ai mund të zgjohet.
Kjo shpikje e re pritet të dalë në treg në shtator, me një çmim prej 1.499 dollarësh, megjithëse kompania po ofron një çmim të përkohshëm si fillim prej 999 dollarësh. /abcnews.al/
