Shumica e udhëheqësve botërorë kanë bërë thirrje për një traktat të ri ndërkombëtar mbi përgatitjen për pandemitë e ardhshme.
Presidenti i Këshillit Europian Charles Michel dhe disa udhëheqës të vendeve europiane u bashkuan me drejtorin e përgjithshëm të Organizatës Botërore të Shëndetësisë (OBSH) Tedros Adhanom Ghebreyesus duke bërë thirrje për “një arkitekturë më të fuqishme shëndetësore ndërkombëtare që do të mbrojë brezat e ardhshëm”.
Pandemia COVID-19 “na ka dhënë një mësim brutal” dhe asnjë vend nuk mund t’ia dalë i vetëm, tha Michel në një konferencë shtypi të martën. Ai tha se qëllimi kryesor i traktatit do të ishte parashikimi, parandalimi dhe përgjigja më e mirë e pandemive në nivel global.
“Askush nuk është i sigurt derisa të gjithë të jenë të sigurt,” shtoi Michel.
Traktati do të rrënjoset në kushtetutën e OBSH-së, thanë udhëheqësit, dhe do të siguronte qasje të drejtë globale në të ardhmen për vaksinat, ilaçet dhe diagnostikimet.
Duke përmendur nënshkrimin e traktateve globale dhe multilateralizmin pas Luftës së Dytë Botërore, udhëheqësit thanë se vendet kishin nevojë të bashkëpunonin për të adresuar kërcënimin e pandemive të ardhshme, raporton abcnews.al
Qëllimi kryesor i këtij traktati do të ishte nxitja e një qasjeje për të gjithë qeverinë dhe për të gjithë shoqërinë, duke forcuar kapacitetet kombëtare, rajonale dhe globale dhe qëndrueshmërinë ndaj pandemive të ardhshme.
Tedros tha se kishte një problem në ndarjen e të dhënave dhe teknologjive, të cilat ishin sfida që mund të adresoheshin në një traktat që do të “forconte kapacitetin global” për t’iu përgjigjur pandemive.
“Ne jemi aq të fortë sa hallka më e dobët,” shtoi ai.
Tedros shtoi se pandemia kishte lulëzuar midis pabarazive në shoqëri dhe nxori në pah më të mirën dhe më të keqen e njerëzimit. Ai tha që COVID-19 kishte zbuluar boshllëqet dhe pabarazitë në shoqëri, duke deklaruar se “bota nuk ka mundësi të presë derisa të mbarojë pandemia për të filluar planifikimin për një tjetër”.
Përgjigja globale ndaj COVID-19 është kritikuar për mungesën e koordinimit dhe barazisë.
Ekspertët kanë deklaruar se vendet nuk i ndoqën paralajmërimet e OBSH-së për emergjencën globale të COVID-19. Zyrtarët e OBSH thanë të martën se një traktat do t’i jepte më shumë peshë Rregulloreve Ndërkombëtare të Shëndetësisë që u miratuan në 2005.
Ndërkohë, fushata globale e vaksinimit ka marrë kritika të shumta pasi kombet e pasura blenë doza të vaksinave në dispozicion, duke lënë vendet e tjera pa inokuluar popullatat e tyre.
Në përgjigje të kritikave në lidhje me fushatën e vaksinave, Michel tha se BE ishte e angazhuar për të ndihmuar COVAX dhe se po punonte për të rritur prodhimin e vaksinave në Europë./abcnews.al
