Biznesmeni Shkelqim Devolli u takua në Londër me drejtorin dhe kryetarin e Bordit të CNN, Mark Thompson. Ata zyrtarizuan partneritetin për hapjen e D1 CNN në Kosovë.
Thompson përgëzoi ekipin e Devolli Corporation për hapjen e televizionit të ri të lajmeve për Kosovën dhe premtoi se CNN do të mbështesë partnerët e tyre kosovarë në çdo kohë.
Sipërmarrësi Devolli theksoi rëndësinë që ka për Kosovën e bashkëpunimi me rrjetin televiziv më të njohur në botë.
”Në këtë ditë të veçantë, 12 qershor, kur para 26 vjetësh e gjithë bota mësonte nga raportimet e CNN se Kosova, vendi ynë, u çlirua, ne po zyrtarizojmë hyrjen e CNN-it në Kosovë. Tash, në Kosovën e lirë, në gjuhën shqipe, CNN do të flasë për shtetin e pavarur. Është një ëndërr e realizuar”, u shpreh ai.
D1 CNN tashmë ka filluar, në bashkëpunim me ekipin mbikëqyrës të CNN, ta rekrutojë stafin për hapjen e kanalit të lajmeve, i cili do të lansohet shumë shpejtë./abcnews.al
