Reali i Madridit nuk ka alternativë tjetër përveç fitores. Ekipi i Zidane do të sfidojë Galatasarayn në Stamboll, në një ndeshje të komplikuar të grupit A. Të dy ekipet kanë nga një pikë pas dy ndeshjeve të para dhe sot janë gati për të dhënë maksimumin.
Reali rikthehet pas 6 vitesh në Turqi. Herën e fundit i shkoi mbarë dhe fitoi 1-6. Dueli tjetër i këtij grupi do të zhvillohet në Belgjikë. PSG do të tentojë fitoren e tretë rresht përballë surprizës Club Brugge, që frenoi Realin në “Santiago Bernabeu”.
Bayern Munchen dëshiron të lërë pas krahëve barazimin e hidhur në kampionat përballë Augsburg. Ekipi gjerman do të luajë në Pire përballë Olympiacosit vendas. Djemtë e Niko Kovac duan fitoren e tretë rresht.
Ka ardhur momenti që Tottenhami të reagojë. Ekipi i Pochettinos ka vetëm një pikë Në grupin B dhe sot pret në shtëpi serbët e Crvena Zvezdës. Triumfi është jetik për Spurs, të cilët nuk mund të mos kualifikohen në një grup të tillë.
Përballje tepër interesante dhe në grupin C. Shakhtari Donetsk dhe Dinamo Zagreb do të zbresin të parat në fushë. Dueli i zhvilluar në Ukrainë nis në orën 18:55. Të dy ekipet numërojnë nga 3 pikë dhe kjo ndeshje ka një rëndësi të madhe për kualifikimin.
Ndeshja më e bukur e mbrëmjes pritet të zhvillohet në “Etihad Stadium”. Manchester City pret Atalantën e Gasperinit dhe Gjimshitit. Mbrojtësi shqiptar do të zbresë në fushë si titullar. Ekipi bergamask kërkon pikët e para, edhe pse përballë do të ketë një nga skuadrat më të forta në botë.
Juventusi nuk pritet të hasë probleme në shtëpi. Bardhezinjtë presin Lokomotiv Moscow. Ekipi i Sarrit kryeson grupin D me Atletico Madrid me nga 4 pikë, ndërsa rusët numërojnë një pikë më pak. Dueli tjetër nis në orën 18:55.
Atletico e Simeones pret Bayer Leverkusen. “Colchoneros” nuk po kalojnë një moment të mirë, por një triumf përballë ekipit gjerman rikthen qetësinë dhe afron Atleticon me kualifikimin. /abcnews.al
Champions League – Faza e grupeve
E martë, më 22 tetor, ora 18:55
Atletico Madrid-Bayer Leverkusen
Shakhtar Donetsk-Dinamo Zagreb
E martë, më 22 tetor, ora 21:00
Club Brugge-Paris SG
Galatasaray-Real Madrid
Juventus-Lokomotiv Moscow
Manchester City-Atalanta
Olympiacos Piraeus-Bayern Munich
Tottenham-Crvena Zvezda
