Bushati u dorëhoq, Basha ia beson Shkodrën Enkelejd Alibeajt

schedule14:34 - 26 Janar, 2022

schedule 14:34 - 26 Janar, 2022

Lulzim Basha ka emëruar drejtues politik në Shkodër, Enkelejd Alibeajn. Emërimi i Alibeajt vjen pas dorëheqjes së Helidon Bushatit.

Në një deklaratë Partia Demokratike bën me dije se Shkodra e ka të domosdoshme drejtimin nga një funksionar i lartë dhe për këtë arsye është zgjedhur nënkryetari, Alibeaj.

Basha ka shprehur falënderimet për Bushatin, ndërsa shpreh bindjen se me drejtimin e ri politik, Partia Demokratike në Qarkun e Shkodrës do të jetë bastion i fuqishëm i PD.

Lexo edhe: Helidon Bushati tërhiqet nga roli i Drejtuesit Politik të PD për Qarkun e Shkodrës

Deklarata e plotë:

Duke e konsideruar qarkun Shkodër si një nga qarqet më të rëndësishme për Partinë Demokratike, Kryetari i Partisë Demokratike ka vlerësuar se qarku Shkodër ka të domosdoshme drejtimin nga një funksionar i lartë i PD dhe ka zgjedhur si Drejtues Politik të qarkut Shkodër, Nënkryetarin e PD dhe Kryetarin e Grupit Parlamentar z. Enkelejd Alibeaj.

Duke falenderuar z. Helidon Bushati për rolin dhe përgjegjësinë e marrë në drejtimin e qarkut gjatë betejës elektorale të 25 Prillit dhe fokusimin e tij aktual tek beteja parlamentare kundër regjimit të korruptuar të Edi Ramës, Kryetari i PD shpreh bindjen se me drejtimin e ri politik, Partia Demokratike në Qarkun e Shkodrës do të jetë bastion i fuqishëm i PD dhe në krye të fitores së PD në gjithë Shqipërinë.

g.v/abcnews.al