Komiteti i ekspertëve në Greqi njoftoi se do të rishqyrtojnë masat e Covid-19, pasi kohët e fundit rastet me koronavirus në vend janë rritur ndjeshëm.
Gjatë konferencës për shtyp, e cila u zhvillua sot komiteti i ekspertëve la të nënkuptohet se çdo skenar për rikthim të masave anti-Covid është i mundur, madje dhe përdorimi i maskës.
“Rekomandimet për përdorimin e maskës do të shqyrtohen nga komisioni bazuar në të dhënat epidemiologjike”, tha nënkryetari i EODY, Dimitris Paraskevis i cili vuri në dukje se Greqia është një nga vendet e pakta që ka ruajtur përdorimin e maska në një kohëzgjatje kaq të madhe.
Ekspertët i bënë thirrje qytetarëve për rritje të vigjilencës.
Sipas komitetit të ekspertëve rritja më e madhe e rasteve është vërejtur në moshat 18 deri 24 vjeç.
Sipas Dimitris Paraskevis zonat me rritjen më të madhe të rasteve janë ishujt e Jonit, Kreta, Egjeu Jugor dhe Atika.
Rritje e ndjeshme, sipas të dhënave të EODY, është shënuar edhe në shkallën e riinfektimeve në 3 javët e fundit.
Janë 150,000 deri në 200,000 raste aktive me Covid-19 në Greqi sipas të dhënave të Ministrisë së Shëndetësisë./abcnews.al/
