Një aksident është regjistruar sot në hyrje të qytetit të Kuçovës, në Meteor. Dy automjete, të tipit Golf dhe Seat Ibiza, janë përplasur dhe si pasojë e goditjes, makina e fundit ka dalë nga rruga duke përfunduar e përmbysur në kanal.
Mësohet se makinat kanë qenë duke qarkulluar në të njëjtin sens, por ende nuk dihet se si ka ndodhur përplasja mes tyre, pasi në momentin e aksidentit ka qenë duke rënë një breshër i fortë.
Fatmirësisht aksidenti ka shënuar vetëm dëme të mëdha materiale, ndërkohë çifti që ndodhej në makinën tip Golf dhe drejtuesi i Seatit kanë dalë pa lëndime.
Në vendngjarje kanë shkuar efektivë të shumtë të policisë rrugore, që po kryejnë edhe këqyrjen e vendit të aksidentit, për të zbuluar edhe dinamikën e tij.
Burimet policore në vendngjarje nuk konfirmojnë ende se cila makinë e ka shkaktuar aksidentin, ndërkohë që mendohet se shkak mund të ketë qenë edhe koha e keqe dhe lagështira në rrugë.
Megjithatë nuk përjashtohet as shpejtësia me të cilën kanë qenë duke qarkulluar të dyja makinat. /abcnews.al
