Shefi i Urgjencës Infektive, Skënder Brataj i ftuar në ABC-ja e mëngjesit foli për situatën e pandemisë, shërbimin e urgjencës dhe vaksinës.
Brataj u shpreh se shumë prej personelit të shërbimit të emergjencës e kanë kaluar koronavirusin me simptoma të lehta, ndonëse theksoi se nuk ka një studim të të tregojë se përqind e tyre janë prekur.
Lexo edhe: “Kemi marrë 365 thirrje më shumë”, Brataj: Shumë pacientë kërkojnë të kurohen në shtëpi
“Mjekët e urgjencës nuk i përdorin testet e shpejta. Tamponin e shpejtë e vlerëson epidemiologu. Në shërbimin e emergjencës ka shumë të prekur sepse jemi vijën e parë, por nuk ka një studim. Janë kryesisht mosha të reja dhe shumë prej tyre e kanë kaluar me simptoma të thjeshta. I shtruar ishte në fillim të pandemisë kryeinfermieri, por më pas nuk kemi pasur të shtruar”, tha Brataj.
Gjatë intervistës Brataj më tej shtoi se ulja e temperaturave, grumbullimet si edhe festat e fundvitit, sollën rritje të shumta.
I pyetur nga gazetari Enkel Demi si mund të vijojë akoma kritika për festat ndonëse kanë kaluar kohë, Brataj tha se rritja e numrit të infeksioneve nëse nuk ndërprehet do të përhapet më shumë.
“Rritja e numrit të të infektuarve vjen zinxhir dhe nëse nuk ndërprehet do të përhapet dhe më shumë”, shtoi Brataj.
Teksa foli për vaksinën anti-covid ai tha se ditën e parë ka qenë prezent dhe vetë kryeministri bëri vaksinën për të dhënë më shumë besueshmëri.
/abcnews.al/
