Pas takimit prej dy orë e 40 minutash me homologun turk, Blinke ka deklaruar se SHBA po punon për të dërguar ndihmën humanitare në Gaza. Antony Blinken tha se përparimi ishte bërë në të gjitha frontet, duke përfshirë përkeqësimin e krizës humanitare brenda Gazës.
“Ne kemi folur me izraelitët në hapat që ata mund të ndërmarrin për të minimizuar viktimat civile,” tha ai.
Blinken ka përfunduar tashmë turneun e tij në rajon, pas takimeve në Izrael të premten, Jordani të shtunën dhe Bregun Perëndimor, Irak dhe Turqi gjatë ditës së djeshme dhe të sotme.
“Ne po punojmë për të dërguar më shumë ndihma humanitare në Gaza dhe kemi mënyra shumë konkrete për ta bërë këtë dhe mendoj se do të shihni në ditët në vijim se kjo ndihmë mund të zgjerohet në mënyra të tjera të rëndësishme”, tha Blinken.
Ai shtoi një paralajmërim se situata e pengjeve po i ndërlikonte gjërat.
“Një aspekt kritik, megjithatë, është të shohim përparim në lirimin e pengjeve, kjo është diçka në të cilën jemi fokusuar intensivisht, por ne gjithashtu besojmë se një pauzë humanitare mund të ndihmojë në avancimin e këtij propozimi gjithashtu,” tha ai.
/abcnews.al
