TIRANË- Kryeministri Edi Rama, ka përshëndetur shkrimin e medias gjermane “Bild”, e cila liston Shqipërinë në krye të destinacioneve për vitin 2025.
Shefi i qeverisë thotë se mbi 350 mijë turistë gjermanë kanë vizituar Shqipërinë deri në muajin nëntor të vitit 2024.
Në shënimin e tij në “Facebook”, Rama pohon se jehona e Bild për turizmin shqiptar është një superepromovim ndërkombëtar.
Ai theksoi se vendi ynë ka nisur përgatitjet, që gjatë muajit mars të prezantohemi “si fytyra e ITB Berlin 2025, panairit më të madh në botë për turizmin”
“Superpromovim ndërkombëtar mediatik nga tabloidi gjerman “Bild” që na rendit në krye të listës së destinacioneve për të udhëtuar gjatë këtij viti. 356 mijë vizitorë nga Gjermania kanë udhëtuar drejt Shqipërisë deri në nëntor, ndërsa po përgatitemi që gjatë muajit mars të prezantohemi si fytyra e ITB Berlin 2025, panairit më të madh në botë për turizmin”, shkruan Rama.
Shkrimi i “Bild” për potencialet e turizmit shqiptar:
Tabloidi gjerman “Bild” i ka bërë Shqipërisë një superpromovim ndërkombëtar mediatik. Media gjermane rendit Shqipërinë në krye të listës së destinacioneve për të udhëtuar gjatë këtij viti. Ministrja e Turizmit dhe Mjedisit, Mirela Kumbaro, nëpërmjet rrjeteve sociale ndau lajmin se nga janari në nëntor të vitit 2024, në vendin tonë hynë 356 mijë vizitorë nga Gjermania.
“Po përgatitemi që gjatë muajit mars të prezantohemi si fytyra e ITB Berlin 2025, panairit më të madh në botë për turizmin”, u shpreh ministrja Kumbaro.
Shqipëria ka marrë ftesën për të qenë vendi i nderit për vitin 2025, si një promovim i jashtëzakonshëm global për Shqipërinë Turistike. Puna ka filluar që në korrik të vitit 2023, sepse kërkon përgatitje shumë të gjatë, është një program 1 vjeçar, i cili ka nisur që në mars 2024.
International Travel Trade Show (ITB) është ekspozita kryesore tregtare në botë e udhëtimeve dhe ofron një mundësi unike për të mësuar rreth vendeve dhe rajoneve të ndryshme në të gjithë globin të mbledhura në një vend të vetëm.
Revista në artikullin e saj ka në fokus rivierën shqiptare, si një risi që po shkëlqen në Mesdhe.
“Shqipëria nuk është më një këshillë sekrete, por në vitin 2025 do të bëhet një destinacion trend për të apasionuarit pas diellit dhe plazhit. Në Rivierën Shqiptare të tërheqin uji i kristaltë, gjiret e vogla dhe fshatrat bregdetare plot hijeshi si Ksamil dhe Himara. Ndryshe nga rajonet e mbipopulluara të Mesdheut, këtu mund të gjesh plazhe të qeta dhe të shijosh natyrën”, shkruan në hyrje të artikullit të saj revista “Bild”./abcnews.al
