Edhe pse dikur shpresonte të ishte kuzhiniere profesioniste, në fund Delphine zgjodhi të ishte një nëpunëse civile. Megjithatë, asaj i pëlqen të gjejë kohë për të gatuar. Ajo thotë: “Është një nga pasionet e mia!”
Delphine është duke përgatitur darkën për miqtë e saj, Catherine dhe Roch. Teksa trazon qepët, ajo thotë se e mirëpret faktin që shumë nëpunës civilë në Belgjikë po marrin të drejtën për t’u shkëputur. “Sidomos për të rinjtë nuk është gjithmonë e qartë se kur duhet të jenë në dispozicion apo jo”.
“Sepse kur fillon një punë të re, dëshiron të jesh i përsosur dhe mendon: “Nëse nuk i përgjigjem atij emaili në orën 10 të natës, ndoshta shefit tim nuk do t’i pëlqejë”. “Pra tani mendoj se do të jetë një ndryshim kulturor”. Nga 1 shkurti, 65,000 nëpunës civilë të qeverisë nuk mund të kontaktohen jashtë orarit normal të punës.
Ka përjashtime, ndoshta me marrëveshje ose nëse diçka nuk mund të presë dhe kjo nuk do të thotë se nuk do të ketë staf për t’u thirrur. Një parim i dytë është që punëtorët nuk duhet të jenë në disavantazh duke mos i’u përgjigjur telefonave ose duke marrë email jashtë orarit raporton gazetarja Jessica Parker “BBC”. Ministrja e Administratës Publike Petra De Sutter beson se ndryshimi do të rrisë efikasitetin.
Ajo thotë se kufiri midis punës dhe jetës personale është bërë gjithnjë e më i paqartë gjatë pandemisë, me kaq shumë që punojnë nga shtëpia. Ky ndryshim i rregullit ishte relativisht i thjeshtë për t’u vendosur pasi zbatohet vetëm për nëpunësit civilë federalë. Një plan për shtrirjen e praktikës në sektorin privat pritet të hasë më shumë rezistencë.
“E drejta për t’u shkëputur nuk duhet të zgjerohet drejt sektorit privat,” tha Eric Laureys i Rrjetit Flemish të Ndërmarrjeve. Ai thotë se do të “zhbëjë” përparimin e parë gjatë pandemisë drejt punës fleksibël. “Do të ishte një shenjë e madhe mosbesimi ndaj aftësisë së punëdhënësve për të organizuar punën”.
Len Shackleton, një studiues në Institutin e Çështjeve Ekonomike dhe profesor i ekonomisë në Universitetin e Buckingham, pajtohet se minon fleksibilitetin.“Kufizimet për kontaktimin e punëtorëve jashtë orarit fiks janë vetëm një dozë e mëtejshme rregullimi”. Petra De Sutter këmbëngul se masa nuk do të jetë një pengesë për punën fleksibël, kur kjo është ajo që punonjësit duan.
“Por nga ana tjetër, ne duhet të mbrojmë të drejtat elementare të punëtorëve”, thotë ajo. Vende të tjera kanë sjellë këto lloj dispozitash, veçanërisht Franca. Në Belgjikë, faza tjetër e debatit duket se është nëse një pjesë më e madhe e punëtorëve duhet të fitojnë gjithashtu të drejtën për t’u shkëputur. / abcnews.al
