Loading ...
Bekim Balaj është një nga emrat më të rëndësishëm të ekipit tonë përfaqësues. Kur shkodrani është në fushë dhe shënon, Shqipëria zakonisht fiton, siç ndodhi edhe ndaj Uellsit.
Kombëtarja e ka një lojtar që i sjell fat. Ky quhet Bekim Balaj, sulmuesi shkodran që thuajse sa herë është në fushë, nuk del i humbur. Sidomos, kur Balaj shënon. E tregoi jo vetëm në miqësoren e fundit, në suksesin 1-0 ndaj Uellsit, me rrjetën e tij nga pika e 11-metërshit.
Balaj ka qenë i rëndësishëm edhe më parë, edhe pse ndoshta teknikisht nuk është në nivelin e Sadikut, Cikalleshit apo Manajt. Nuk harrohet goli i rrallë dhe tepër i rëndësishëm në Aveiro të Portugalisë, në ndeshjen e parë në grup për eleminatoret e Euro 2016-ës.
Me atë gol, u sigurua fitorja më përcaktuese e edicionit, ndërsa Balaj ishte në fushë edhe në ndeshjen e paharruar në Beograd ndaj Serbisë, që përfundoi me ngritjen e dronit dhe përplasjen e lojtarëve në fushë.
27-vjeçari ishte gjithashtu shpëtimtari në duelin e luajtur gjatë dy ditëve ndaj Maqedonisë, kur realizoi golin e fitores në Shkodër. Kjo, në minutën e fundit shtesë për suksesin 2-1 në eleminatoret e Botërorit 2018.
Balaj plotëson pesë rrjetat e tij në 30 takime me përfaqësuesen, me golat në fushën e Lihtenshtajnit, po për eleminatoret e Botërorit fituar 2-0, dhe në miqësoren e humbur ndaj Bosnjë-Hercegovinës në Elbasan./abcnews.al
