Ushtria izraelite sulmoi perferinë jugore të Bejrutit duke vrarë të paktën katër persona.
Të paktën shtatë persona të tjerë u plagosën në sulmin ajror të së martës, sipas Ministrisë libaneze të Shëndetësisë.
Izraeli tha se kishte në shenjestër një anëtar të grupit militant Hezbollah dhe sulmoi pa paralajmërim.
Ushtria izraelite tha në një deklaratë se sulmi i fundit kishte në shënjestër një anëtar të Hezbollahut, i cili kishte ndihmuar grupin palestinez Hamas në Rripin e Gazës në planifikimin e një sulmi kundër civilëve izraelitë.
Në mesin e të vrarëve në sulmin ajror ishte zyrtari i Hezbollahut, Hassan Bdeir dhe djali i tij, Ali, sipas një zyrtari të Hezbollahut. Zyrtari tha se dy personat e tjerë të vrarë ishin fqinjët e tyre.
Gjatë luftës së Izraelit me Hezbollahun, dronët dhe avionët izraelitë goditën rregullisht periferitë jugore, ku Hezbollahu ka ndikim dhe mbështetje të gjerë. Izraeli e sheh zonën si një bastion të militantëve dhe e akuzon grupin për ruajtjen e armëve atje.
Të premten e kaluar Izraeli rinisi sulmet ndaj Libanit, pasi përfundoi një armëpushim që ishte arritur me Hezbollah në nëntor.
Sipas armëpushimit të ndërmjetësuar nga SHBA, që i dha fund luftës 14-mujore Izrael-Hezbollah, forcat izraelite supozohej të tërhiqeshin nga i gjithë territori libanez deri në fund të janarit, ndërsa Hezbollah duhej t’i jepte fund pranisë së tij të armatosur në jug të lumit Litani përgjatë kufirit me Izraelin.
/abcnews.al
