Partizani po mendon të bëjë një lëvizje të befasishme në merkato. Sipas asaj që raporton gazeta “Panorama Sport”, në kampin e kuq mendojnë të rikthejnë në ekip mbrojtësin e djathtë, Labinot Ibrahimi.
Anësori ishte pjesë e të kuqve në kupat e Europës dhe luajti titullar në dy ndeshjet me Qarabag në Champions League. Ibrahim ishte në fushë edhe ndaj Sheriff Tiraspol në Europa League dhe më pas kaloi te Prishtina.
Me bardhekaltrit po aktivizohet si mbrojtës qendre, ndërsa Partizani e do për linjën e djathtë të prapavijës. Trajneri Franco Lerda deri më tani ka aktivizuar në krah Esat Malën, kurse së fundmi është rikuperuar Hektor Idrizaj dhe vlonjati ishte titullar në takimin e fundit ndaj Kukësit. /abcnews.al
