Agjencia e barnave e Bashkimit Europian ka deklaruar të martën se mund të duhen edhe katër javë për të miratuar vaksinën të parë të koronavirusit, edhe pse autoritetet në Shtetet e Bashkuara dhe Britania vazhdojnë të synojnë dritë jeshile përpara Krishtlindjeve.
Agjencia Europiane e Barnave ka planifikuar një takim deri më 29 Dhjetor për të vendosur nëse ka mjaftueshëm të dhëna për sigurinë dhe efikasitetin në lidhje me vaksinën e zhvilluar nga Pfizer dhe BioNTech që të aprovohet.
Rregullatori gjithashtu tha se mund të vendoste që në 12 janar nëse do të aprovonte një rival nga kompania farmaceutike amerikane Moderna Inc, e cila paraqiti kërkesën e saj tek rregullatorët e SHBA-së dhe Europës këtë javë.
Nëse vaksina e saj miratohet, BioNTech me bazë në Gjermani tha se përdorimi i saj në Europë mund të fillojë para fundit të vitit 2020, por kjo duket mjaft ambicioze, duke pasur parasysh që Komisioni i BE-së duhet të vulosë vendimin e rregullatorit. Agjencia ka lënë gjithashtu të hapur mundësinë që data e atij takimi të jetë më përpara, nëse të dhënat vijnë më shpejt.
Çdo miratim i dhënë nga rregullatori europian do të jetë i kushtëzuar nga informacionet që paraqesin kompanitë, për të konfirmuar përfitimet e vaksinës, më shumë se rreziqet.
Gjermania, e cila i ka dhënë BioNTech 375 milionë euro fonde për zhvillimin e vaksinës, është përgatitur të fillojë imunizimin e njerëzve nga mesi i dhjetorit e tutje.
BioNTech dhe partneri amerikan Pfizer kanë thënë se provat klinike treguan se vaksina e tyre është 95% efektive. Të dy kompanitë kanë paraqitur tashmë të dhëna te rregullatorët në Shtetet e Bashkuara dhe Britaninë, dhe miratimi mund të vijë së pari nga ata./abcnews.al
