Ambasadorja e Francës në Tiranë, Elisabeth Barsacq ka mbështetur qëndrimin e delegacionit të Bashkimit Evropian në Shqipëri lidhur me rregullat e reja të vendosura nga Kuvendi i Shqipërisë për praninë e medias.
Në një postim në Twitter, Barsacq bën thirrje për të mbështetur lirinë e medias. Diplomatja franceze shprehet se liria e shtypit është baza e të gjitha lirive të tjera, “me anë të kësaj ne ndriçojmë reciprokisht veten.”
Voltaire: “Soutenons la liberté de la presse, c’est la base de toutes les autres libertés, c’est par là qu’on s’éclaire mutuellement.” https://t.co/7CDUggBHwJ
— BARSACQ Elisabeth (@EliBARSACQ) June 9, 2021
Më herët gjatë të mërkurës, BE me anë të një reagimi në Twtter solli në vëmendje se dëgjesat publike dhe aksesi i mediave në parlament është tipar i rëndësishëm i një demokracie liberale.
Gjithashtu, delegacioni i BE hodhi poshtë versionin e mbajtur nga Kuvendi i Shqipërisë se rregullat e reja nuk janë në përgjigje të udhëzimeve të BE-së apo të këshillave të vëna në dispozicion nga Instrumenti për Asistencë Para-Anëtarësimit.
Kuvendi i Shqipërisë më herët gjatë ditës së sotme, me anë të një njoftimi informoi palët e interesuara se projekti i është dërguar BE-së në rrugë zyrtare në 2014, dhe me miratimin e paketës IPA 2014, përfshihet edhe mbështetja financiare për instalimin e sistemit të ri audio-video.
“Projekti i sistemit i është dërguar BE-së në rrugë zyrtare më datën 27 Maj 2014 dhe i është prezantuar nga Kuvendi përfaqësuesve të BE-së në dy takimet e zhvilluara më datat 28 maj dhe 3 qershor 2014. Më datën 17 dhjetor 2014, Komisioni Europian miratoi paketën IPA 2014 për Shqipërinë, e cila përfshin edhe mbështetjen financiare për Kuvendin për instalimin e sistemit të ri audio-video.” s.b/abcnews.al/
