Basha takon bizneset në Pogradec: Kriza ekonomike e ka burimin tek dështimet e njëpasnjëshme

schedule19:33 - 4 Korrik, 2020

schedule 19:33 - 4 Korrik, 2020

Kryetari i Partisë Demokratike, Lulzim Basha, u takua me qytetarë dhe biznese në Pogradec për të dëgjuar shqetësimet rreth rënies drastike të ekonomisë dhe mungesës së ndihmës prej qeverisë.

Në çdo biznes ishte garantuar respektimi i masave për distancimin social dhe higjienën, por problem mbetej gjendja e rënduar ekonomike.

Gjatë takimeve me kryetarin e opozitës, sipërmarrësit ndanë shqetësimin për krizën e rëndë ekonomike, që shoqërohet me largimin e njerëzve nga puna dhe me mbylljen e biznesit.
Një tregtar i tha Bashës se dyqanin e kishte mbajtur hapur gjithë kohës, por siguracionet, taksat dhe faturat po paguhen në mënyrë normale përkundrejt premtimit të qeverisë se ato do të shtyheshin.

“Janë siguracionet që duhen paguar muaj për muaj, që është barrë e madhe. Duhen paguar ujë, drita, tarifa jonormale që vazhdojnë akoma. Nuk pretendojmë për fitime, pretendojmë të mbijetojmë. Një nga problemet kryesore të biznesit janë taksat, të cilat duhen paguar njësoj si një vit më parë, megjithëse ata nuk e kanë hapur biznesin për dy muaj me radhë,” tha pronari i një lokali në Pogradec.

Sipas kryedemokratit biznesin po e dëmtojnë rëndë taksat, tatimet, si edhe rënia e konsumit për shkak të pandemisë ekonomike. Pjesa më e madhe e bizneseve në Pogradec vuajnë rënien e xhiros në masën 50%, 60%, madje në disa raste të tjera dhe 70%.

Kryetari i Partisë Demokratike vizitoi dhe ambientet e një fasonerie. Gjatë bisedës me kreun e opozitës, pronari i fasonerisë iu shpreh se kostot ishin rritur për shkak të masave të marra kundër infeksionit në muajt e parë të pandemisë.

Basha iu premtoi punëtorëve të fasonerisë se me uljen e taksave për biznesin, rrogat e tyre do të rriteshin.

Kreu i opozitës Basha tha se kjo është krizë ekonomike që e ka burimin tek dështimet e njëpasnjëshme dhe keq-alokimet e financave publike nga ana e qeverisë.

Ai theksoi nevojën urgjente që ka biznesi për mbështetjen e duhur dhe kjo, sipas tij, do vijë me planin e Partisë Demokratike për ekonominë.

“Kjo është kriza ekonomike që e ka burimin tek dështimet e njëpasnjëshme dhe keqalokimet e financave publike nga ana e qeverisë. Shqipëria duhet të jetë e të gjithë shqiptarëve dhe këtë kemi parasysh me taksën e sheshtë 9% për biznesin mbi 140 milion, me taksen 0.5% të xhiros për të gjithë biznesin e vogël nën 140 milion lekë. Asnjë tatim, asnjë taksë tjetër, të punojnë lirisht.

Këtë kemi parasysh me karantinën e inspektoriateve vitin e parë të qeverisjes time të ardhshme. Një vit karantinë do të thotë: Nukk do të shikojnë inspektorë me sy deri sa ne të kemi ligjin dhe zbatimin e ligjit në nivele europiane. Në asnjë vend të Europës nuk vjen inspektori sa hap qepenin e derisa mbyll qepenin, tatimorja, ambjentalisti, higjenisti t’i bëjë terror biznesit”, tha Basha.