Basha për 100-vjetorin e Tiranës: Qytetari legjendare, mbetet shpresa për një të nesërme më të mirë

schedule20:21 - 11 Shkurt, 2020

schedule 20:21 - 11 Shkurt, 2020

Kryetari i opozitës, Lulzim Basha, me rastin e 100-vjetorit të Tiranës është shprehur se Tirana është zemreku i kombit. Në rrjetin social “Facebook”, lideri i PD shkruan se mirënjohja në këtë ditë historike i takon komunitetit autokton të Tiranës.

“Sot kryeqendra e shqiptarëve kremton 100 vjetorin e saj si kryeqytet. Në këtë ditë historike, mirënjohja e parë me përulësi i takon komunitetit autokton të Tiranës që me shpirtgjerësi të pashembullt dhe me qytetari legjendare, mundësoi që ky qytet të rritet, të zhvillohet dhe të kthehet në vatër të të gjithë shqiptarëve, të rinisë dhe shpresave të gjithë kombit.

Tirana mbajti mbi supet e saj pesha të rënda në kohë të vështira. Familjet e mëdha të Tiranës hapën dyert dhe zemrat për shumë prej shqiptarëve të dëbuar nga trojet stërgyshërore, dhe për këdo që kërkoi dhe gjeti shanset për një jetë më të mirë pas rrëzimit të regjimit komunist.

Qendra ekonomike, kulturore dhe shoqërore e Shqipërisë, mbetet sot zemreku i kombit ku ngërthehet shpresa dhe besimi i shqiptarëve për një të nesërme më të mirë. Zoti e bekoftë Tiranën, Shqipërinë dhe shqiptarët!” shkruan Basha.