Grupi parlamentar i PD-së është mbledhur sot paradite në selinë blu. Burime nga takimi bëjnë me dije për ABC News se Lulzim Basha gjatë diskutimit ka theksuar se vendi është në kolaps dhe se Partia Demokratike do të vijojë betejën për dekriminalizimin e zgjedhjeve.
“Ne do të përgatitemi intensivisht për zgjedhje dhe do t’i fitojmë ato. Duhet të bëhemi gati pasi dita e përballjes me qeverinë mund të vijë më shpejt se ç’e mendojmë”, mësohet të ketë deklaruar kreu i selisë blu.
Kryedemokrati Basha mësohet të ketë paralajmëruar daljen e atyre qe i quan “skandale” të reja të kësaj qeverie. Kjo mazhorancë, sipas tij, minimalisht 15 mandate i ka marrë përmes bashkëpunimit me grupe kriminale. Kjo për Lulzim Bashën është arsye e mjaftueshme për të konfirmuar vazhdimin e qëndrimit të demokratëve ndaj Parlamentit, bojkotit të tij të plotë që nga nisja e sesionit të ri parlamentar prej muajit Shtator. Lidhur me kreun e bashkisë Durrës, Vangjush Dako, kryedemokrati Lulzim Basha mësohet të ketë deklaruar se grupi hetimor ka sugjeruar arrestimin e tij, por urdhër arresti nuk ka dalë nga Prokuroria.
