Sulmuesi i Interit, Lautaro Martinez, me shumë mundësi do të largohet nga Milano këtë verë. Argjentinasi falë paraqitjeve shumë të mira dhe golave të tij me fanellën zikaltër është pranë një kalimi tek Barcelona. Katalanasit kanë disa kohë që e monitorojnë Lautaron dhe e shikojnë si zëvendësuesin e denjë për Luis Suarez.
Klubi i Interit po mendon që tani alternativat në rast se 22-vjeçari largohet. Sipas “La Gazzetta dello Sport”, interistët kërkojnë firmën me kapitenin e Arsenalit, Pierre-Emerick Aubameyang. Sulmuesi nga Gaboni ishte shumë pranë largimit nga Londra në merkaton e janarit, por më pas vendosi që ta përfundojë dhe këtë sezon me “Topçinjtë”.
30-vjeçari u shpall sezonin e kaluar golashënuesi më i mirë i Premier League, së bashku me Salah dhe Mane. Gjithashtu dhe nga mediat spanjolle flitej se do të ishte Aubameyang, ai që do të zëvendësonte Suarezin e dëmtuar, por një transferim i tillë nuk ndodhi. Sulmuesi ka dhe një vit kontratë me londinezët dhe më pas do të jetë një lojtar i lirë. /abcnews.al
