Loading ...
Banorët e një pallati në Durrës kanë protestuar këtë të mërkurë para bashkisë pasi prej dy muaj janë ndërprerë punimet për rikonstruksionin e objektit.
Gazetari Leonidha Musaj ndër të tjera bën me dije se banorët e këtij pallati në lagjen 12 kanë dhe dy muaj pa marrë bonusin e qirasë.
“Jemi në hall të gjithë banorët e pallatit, pasi po bëjmë 2 vite që nga tërmeti që ne jemi larguar nga shtëpia. Punimet për rikonstruksionin e pallatit kanë filluar në qershor dhe u ndërprenë në gusht, ndërsa nga bashkia nuk kemi asnjë përgjigje. Kemi dhe dy muaj pa marrë bonusin e qirasë”, është shprehur një banore e pallatit.
“Qëllimi i protestës është se në pallatin tonë projekti nisi në qershor dhe i ndërprenë, por akoma nuk ka asnjë shenjë për rifillimin e punimeve. Nuk kemi marrë as bonusin e qirasë”, ka thënë një tjetër banor.
Ndërkohë burime nga Bashkia e Durrësit për abcnews.al theksojnë se bonusi nuk ju është dhënë për shkak se nuk është kaluar fondi nga ministria e Financave.
