Nga Erblina Mile
Bizneset e vogla dhe të mesme nuk kanë arritur që të marrin hua nga sistemi bankar gjatë periudhës janar-shkurt- mars. Vrojtimi i Bankës së Shqipërisë thekson se sistemi bankar është treguar i kujdesshëm në dhënien e kredive sidomos gjatë muajit mars kur çmimet arritën nivele rekord.
Për të shmangur problemet me kthimin e huave ,bankat janë treguar më konservatore ndaj segmentit të biznesit të vogël e të mesëm i cili është prekur më shumë nga kriza e rritjes së çmimeve.
Kujdesi i shtuar i bankave në kreditimin e bizneseve, u reflektua në faktin e miratimit më të ulët të numrit të huave të kërkuara.
Po ashtu bankat reduktuan shumën e kredisë akorduar bizneseve, si edhe shtuan kriteret në marrëveshjet e kredisë.
Nga ana tjetër bizneset kanë shtuar ndjeshëm kërkesën për marrje kredish me qëllim vijimin e investimeve por edhe për të mbuluar shpenzimet e përditshme.
Por ky qëndrim nuk ka qenë i njëjtë për bizneset e mëdha apo për individët kryesisht për blerje banesash për të cilat bankat janë treguar më dorëlëshuar.
Bankat presin që e njëjta situatë e kushteve të ofertës dhe kërkesës për kredi të vijoj edhe në pjesën e mbetur të vitit.
Bankat do të vijojnë kujdesin e shtuar kundrejt kreditimit të bizneseve ndërsa pritet që për shkak të rritjes së çmimeve
kërkesa për kredi, si nga ana e bizneseve ashtu edhe e individëve, do të shtohet.
Ulja e nivelit të kredive dhe shtrenjtimi i atyre në lekë ishte e pritshme edhe si pasojë e rritjes së normës së interesit nga Banka e Shqipërisë.Pas rreth dy dekadash Banka Qendrore rriti normën e interesit nga 0,5% në 1%.
Kjo lëvizje ka dhënë efektet e para në shtrenjtimin e kredive në lekë si dhe në kriteret e përzgjedhjes së klientëve nga bankat.
/abcnews.al
