Avokatja e Popullit për shoqërimin e aktivistëve protestues: Veprimi i policisë për të heshtur zërin kundër

schedule21:04 - 11 Maj, 2020

schedule 21:04 - 11 Maj, 2020

Avokatja e Popullit Erinda Ballanca në një bisedë të zhvilluar në ABC News me gazetaren Mirela Milori u shpreh se veprimet e policisë të marra ndaj aktivistëve që protestonin në sheshin “Skënderbej” kundër masave të marra nga qeveria për shkak të pandemisë, janë të gabuara për më tepër janë bërë për të heshtur zërin kundër.

“Nga informacionet që ne kemi është njoftuar se do të mbahej një tubim. Në kushtet e gjendjes së fatkeqësisë natyrore për shkak të pandemisë disa të drejta tonat janë kufizuar por në çdo rast duhet të shohim proporcionalitetin e kufizimeve, nëse këto kufizime janë të duhura ose jo.

Pavarësisht se qeveria ka marrë masa për kufizimin kjo nuk do të thotë se ne nuk kemi të drejta dhe se këto të drejta nuk duhet të rishikohen në vijimësi.  Parimisht është një e drejtë që mund të kufizohet, a është kufizuar në masën e duhur?

Jo nuk është kufizuar në masën e duhur. Në gjykimin tonë nëse tubimet organizohen dhe ruan masat e distancimit social kjo nuk ka pse të pengohet.

Qeveria duhet të jetë koshiente, dhe të garantojë të drejtat e qytetarëve edhe atë të protestës së lirë, është detyrimi i saj primar, dhe të na provojë se kufizimi që ajo po bën është masa më e përshtatshme në këtë situatë.

Veprimi i organeve ligjzbatuese duhet të jetë i përshtatshëm për të arritur qëllimin dhe për ta kuptuar se duhet zbatuar në mënyrë proporcionale. Ne na shqetësoi mënyra se si u shoqëruan forcërisht në komisariat, veprimi është jo në proporcion me qëllimin e vënë për kufizimin. Shteti shqiptar nuk mund të ndalojë të drejtën e protestës në mënyrë absolute.

Çdo veprim duhet të jetë i atillë që të kuptohet për se është marrë një masë e tillë. Ky veprim është marrë për të heshtur zërin kundër gjë që e cila është në kundërshtim me ligjin dhe Kushtetutën e Republikës së Shqipërisë”, tha Ballanca.

E pyetur se reagime të ndryshme për çështjet e korrupsionit kanë thënë se duhet të ndërhyjë avokati i popullit, Ballanca u përgjigj se për çështjet e korrupsionit nuk vendos Avokati i Popullit dhe se është një kompetencë që i takon prokurorisë.

“Ky është Hakerimi që i është bërë faqes së kryeministrisë. Aty ka probleme disa thelbësore. Fatkeqësisht avokati i popullit nuk merret me çështjet e korrupsionit. I takon prokurorisë të merret me këtë.

Çfarë është shqetësuese është se ndjej se ka një keqkuptim lidhur me mandatin e avokatit të popullit. Është e pamundur që institucioni i avokatit të popullit me atë staf të vogël që ka nuk mundet të adresojë të gjithë çështjet që e shqetësojnë këtë vend.

Fakti që pretendohet dhe kërkohet nga Avokati i Popullit që të mbështesë protestat edhe kjo nuk është çështje që i takon Avokatit të Popullit. Avokati i Popullit mbështet të drejtën në përputhje me ligjin për të protestuar nga qytetarët”, tha ajo.

Avokatja e Popullit tha gjithashtu se mungesa e Gjykatës Kushtetuese bën që të mos kontrollohet proporcionaliteti i masave të marra nga qeveria.

“Mungesa e Gjykatës Kushtetuese është një mungesë shumë e madhe për vendin.

Për më tepër se kurrë në kohët e gjendjes së jashtëzakonshme kur për definicion qeveritë dhe ekzekutivi marrin më shumë pushtete më të mëdha në duart e veta janë të domosdoshme mekanizmat  e balancimit  të kontrollit qoftë nga ana e parlamentit qoftë nga ana e sistemit gjyqësor.

Janë të domosdoshme në këtë kohë. Sot ndjehet më shumë mungesa e Gjykatës Kushtetuese sepse do të kishte sigurisht një vendimmarrje për të parë nëse këto masa janë marrë në mënyrë proporcionale”, theksoi avokatja./abcnews.al