Presidenti i Azerbajxhanit, Ilham Aliyev tha se avioni ku humbën jetën 38 persona javën e kaluar u rrëzua nga Rusia megjithëse pa dashje.
“Mund të themi me qartësi të plotë se avioni u rrëzua nga Rusia … Nuk po themi se është bërë qëllimisht, por është bërë”, tha ai për televizionin shtetëror të Azerbajxhanit.
Aliyev akuzoi Rusinë se po përpiqej të fshihte shkakun e ngjarjes.
“Për fat të keq, për tre ditët e para nuk dëgjuam asgjë nga Rusia përveç versioneve delirante,” tha ai.
Aliyev tha se Azerbajxhani i bëri tre kërkesa Rusisë në lidhje me rrëzimin.
“Së pari, pala ruse duhet t’i kërkojë falje Azerbajxhanit. Së dyti, ajo duhet të pranojë fajin e saj. Së treti, ndëshkoni fajtorët, sillni ata në përgjegjësi penale dhe paguani dëmshpërblim shtetit të Azerbajxhanit, pasagjerëve të lënduar dhe anëtarëve të ekuipazhit”, shtoi presidenti i vendit./abcnews.al
