Autoriteti i shëndetit publik holandez konfirmoi të dielën se 13 persona që mbërritën në vend me fluturime nga Afrika e Jugut të premten kanë rezultuar pozitivë me variantin “omicron” të koronavirusit.
61 personat që rezultuan pozitivë për virusin të premten pasi mbërritën në dy fluturimet e fundit në aeroportin Schiphol të Amsterdamit përpara se të vendosej një ndalim fluturimi, u izoluan menjëherë dhe më pas u bënë testet e nevojshme për të përcaktuar nëse e kishin variantin e ri.
Instituti i shëndetit publik tha në një deklaratë se po vijohet testimi i mostrave të tjera.
Shumica e 61 personave që rezultuan pozitivë u vendosën në izolim në një hotel afër aeroportit, ndërsa një numër i vogël u lejuan që të karantinohen në shtëpi, në kushte të rrepta izolimi.
“Varianti Omicron deri më tani është identifikuar në 13 nga testet pozitive. Hetimi ende nuk ka përfunduar. Varianti i ri mund të gjendet në më shumë mostra testimi, “tha në një deklaratë Instituti Kombëtar për Shëndetin Publik në Holandë. /abcnews.al/
