Policia austriake ka gjetur tetë persona të ardhur nga Turqia të fshehur në kushte kërcënuese për jetën në një kuti të ngushtë prej druri të ngjitur në pjesën e poshtme të një kamioni.
Policia tha se grupi ishte trafikuar nga Rumania nëpërmjet Hungarisë. Disave prej tyre u ra të fikët gjatë udhëtimit sepse u ekspozuan ndaj tymit të shkarkimit për orë të tëra.
Vendin ku ishin fshehur personat e trafikuar e kanë përshkruar si një “kuti tmerri”.
Zyrtarët thanë se shoferi, një turk 39-vjeçar, rrëfeu se kishte kontrabanduar deri në 40 persona në Austri në tetë udhëtime. Secili duhej të paguante midis 15,000 dhe 16,000 € për udhëtimin e rrezikshëm. Një bashkëpunëtor i dyshuar, një turk 56-vjeçar, u arrestua të premten në qytetin austriak të Gracit. /abcnews.al
