Loading ...
Nuk ishte dita e tyre. Dy futbollistë shqiptarë ishin pjesë e ekipeve të tyre në gjysmëfinalen e Kupës së Italisë mes Lacios dhe Atalantës, por asnjëri prej tyre nuk e pa fushën.
Berat Gjimshiti, kapiteni i kombëtares, dhe mbrojtësi tjetër veteran, Elseid Hysaj, ishin në stol në një duel të ashpër në stadiumin “Olimpiko” të Romës, që u mbyll me rezultatin 2-2.
Barazimi padyshim që bën bergamaskët favoritë për të kaluar në finale, dhe për të synuar më në fund një trofe në Apenine, ndonëse asgjë nuk është e vendosur.
Ishte një ndeshje e ekuilibruar, në të cilën vendasit ishin dy herë në avantazh, por duke mos arritur dot fitoren.
Dele-Bashiru kaloi Lacion në epërsi 1-0 në 47’, pra me të nisur pjesa e dytë.
Më pas, Mario Pashaliç barazoi në 51’, ndërsa Dia tre minuta para fundit i dha sërish avantazhin romanëve.
Në 89’, Musah barazoi përfundimisht për 2-2.
Ndeshja e dytë gjysmëfinale do të luhet në Bergamo në 22 prill, pra ka kohë deri atëherë.
Më herët, Atalanta e Gjimshitit do të synojë të arrijë zonën Champions të Serisë A, ndërsa afron ndeshja e madhe ndaj Bajernit në të tetat e finaleve të Ligës së Kampionëve, që do të zhvillohet në 10 mars në Bergamo, me kthimin në Mynih në 18 të këtij muaji.
