Familjarët e viktimave të masakrës së Lojërave Olimpike të Mynihut të vitit 1972 kanë arritur një marrëveshje me qeverinë gjermane, vetëm disa ditë përpara 50-vjetorit më 5 shtator, të cilën familjet kishin planifikuar ta bojkotonin, sipas The Guardian.
Sipas ish-ministrit gjerman Gerhart Baum, i cili tashmë është një nga përfaqësuesit ligjorë të familjarëve të viktimave, shuma totale e vendosur për dëmshpërblim është rreth 28 milionë euro.
Më 5 shtator 50 vite më parë, 11 sportistë izraelitë u vranë gjatë sulmit të grupit terrorist palestinez “Shtatori i Zi”, pas dështimit të operacionit për çlirimin e tyre që u krye nga policia gjermane.
“Ne e mirëpresim faktin që pak para 50-vjetorit të masakrës ndaj sportistëve izraelitë në Lojërat Olimpike të Mynihut, u arrit një marrëveshje për kompensimin e familjeve të viktimave.
Kjo marrëveshje nuk mund të shërojë plagët, por përfshin një marrje të përgjegjësisë nga Gjermania dhe njeh vuajtjet e tmerrshme të viktimave, të cilët do t’i përkujtojmë javën e ardhshme”, shkruhet në deklaratën e përbashkët të presidentëve Isaac Herzog dhe Frank-Walter Steinmeier.
/abcnews.al
