MAROK- Arrestohet në Marok autori i dyshuar i vrasjes së biznesmenit Ardian Nikulajt. Policia e Shtetit thotë se arrestimi i tij u krye në bashkëpunim të ngushtë me partnerët ndërkombëtarë dhe agjencitë ligjzbatuese.
Abc News mëson se portugezi, Ruben Saraiva, në momentin e arrestimit ka qenë i vetëm në një lokal, ndërsa tani pritet ekstradimi i tij drejt Shqipërisë për t’u përballur me akuzën e vrasjes, të kryer në bashkëpunim.
Biznesmeni u ekzekutua me shtatë plumba në ambientet e biznesit të tij në zonën e Shëngjinit. Nikulaj mbahej në vëzhgim nga disa persona të tjerë deri sa portugezi i kamufluar me maskë arriti të hynte në lokal duke e qëlluar biznesmenin lezhian për vdekje.
Edmond Haxhia dyshohet se është porositësi dhe organizatori i vrasjes së biznesmenit. Ai është nipi i Elton Lekstakaj, i cili kanë qenë në hasmëri me fisin Nikulaj prej vitit 1997.
Njoftimi i Policisë:
Falë informacioneve të siguruara si rezultat i punës kërkimore, në bashkëpunim të ngushtë me partnerët dhe agjencitë ligjzbatuese, u bë i mundur lokalizimi dhe kapja në Marok, e autorit të dyshuar të vrasjes së shtetasit Ardian Nikulaj.
Policia marokene, pas shkëmbimit të informacionit mes Interpol Tiranës dhe Interpol Rabat, Marok, ka bërë të mundur lokalizmin në Rabat, Marok, kapjen dhe vënien në pranga, me qëllim ekstradimin drejt Shqipërisë, të shtetasit portugez R. R. S., 28 vjeç.
Gjykata e Shkallës së Parë e Juridiksionit të Përgjithshëm Lezhë, me vendimin nr. 97, të datës 26.04.2023, ka caktuar masën e sigurisë “Arrest në burg”, për veprat penale “Vrasja për gjakmarrje” dhe “Prodhimi dhe mbajtja pa leje e armëve luftarake dhe e municionit”.
Policia e Shtetit në bashkëpunim me agjencitë ligjzbatuese dhe me autoritetet marokene, po punon për të bërë të mundur ekstradimin e 28-vjeçarit, drejt Shqipërisë. Ndërkohë, vijon intensivisht puna kërkimore në bashkëpunim të ngushtë me partnerët, për lokalizimin dhe kapjen edhe të shtetasit të fundit të shpallur në kërkim në lidhje me këtë ngjarje/ n.m.abcnews.al
