Gjykata e Tiranës ka lënë në burg 4 shpërndarësit e kokainës të arrestuar pas një operacioni anti-drogë të zhvilluar dy ditë më parë në zonën e “Varrit të Bamit”, pranë një biznesi për makina më qira.
Ndërsa ka liruar nga qelia Gazmir Canin, i cili ishte drejtuesi i “Benz”-it që u largua me shpejtësi duke vendosur në rrezik jetën e agjentëve të policisë.
Në burg do të qëndrojnë Gentian Kore, Erjon Prengaj, Altin Gega dhe Taulant Çoku.
Lexo edhe: Antidroga te “Varri i Bamit”, si u infiltruan agjentët, makinat me qira dhe dërgesa me pica
Nga hetimet, dyshohet se këta persona përdornin biznesin për sjelljen e lëndës narkotike dhe më tej ndarjen e saj në doza më të vogla dhe shpërndarjen në disa pika të kryeqytetit.
Ky biznes ishte në pronësi të shtetasit Gentian Kore, ndërsa sasia e lëndës narkotike sillej nga dy persona me motor brenda kutive të picave.
Në momentin që efektivët e antidrogës kanë ndërhyrë 4 të hetuarit janë larguar me shpejtësi, ndërsa lënda narkotike është gjetur në brendësi të dy kutive të picave, e fshehur poshtë një makine.
Ndërhyrja e policisë u bë virale në rrjetet sociale, kjo për shkak se efektivët e policisë gjatë operacionit nuk ndaluan dot një makinë me xhama të zinj që ishte pranë vendit të ngjarjes, si dhe dhunës së shfaqur ndaj gazetarit Ergys Gjençaj, i cili po filmonte skenën.
Për këtë episod ka nisur edhe një hetim nga ana e SHÇBA dhe Prokurorisë, ku do të shihen veprimet e efektivëve të policisë. Sakaq në operacionin e quajtur “Xhamlliku” u sekuestruan 1 kg e 128 gr lëndë narkotike kokainë, 3 automjete dhe 7 aparate celulare.
/abcnews.al/
