Loading ...
Kryetari i Grupit Parlamentar të Partisë Demokratike, Enkelejd Alibeaj, ka mbledhur këtë të enjte në selinë blu, grupin Parlamentar të PD.
Ishte Alibeaj ai që autorizoi dje sekretarin e grupit të PD-së, Arbi Agalliun, që të njoftojë deputetët që sot, një orë para seancës plenare, në selinë blu do të mblidhet Grupi Parlamentar.
Mesazhi i kreut të grupit parlamentar, Enkelejd Alibeaj ka mbërritur edhe tek 9 deputetë të PD të cilët pak muaj më parë u pezulluan për shkak të qëndrimeve të tyre, por jo tek deputetët e përjashtuar Sali Berisha, Flamur Noka, Albana Vokshi, Edmond Spaho dhe Luan Baçi. Megjithatë në mbledhje ka marrë pjesë Berisha bashkë me të përjashtuarit e tjerë. Berisha, i cili rikthehet pas 6 muajsh në mbledhje grupi nuk ka pasur një prononcim për mediat gjatë hyrjes në selinë e PD.
Mësohet se edhe për prezencën e të përjashtuarve në mbledhjen e kësaj të enjteje ka pasur negociata mes anëtarëve të Komisionit të Rithemelimit dhe kreut të grupit parlamentar, Alibeaj. Sali Berisha zhvilloi mesditën e djeshme një takim me deputetët e PD që janë pjesë e Komisionit të Rithemelimit. Në fund të takimit siguroi se ai do të jetë pjesë e mbledhjes.
Kjo vendimmarrje e Sali Berishës nga ana e Gazment Bardhin u quajt injorim i vendimmarrjeve dhe qëndrimeve të grupit parlamentar. Ai i ka kujtuar ish-kryeministrit vendimin për përjashtimin nga grupi parlamentar.
“Një parti ku nuk respektohet vullneti, qëndrimi dhe vlerësimi i Grupit Parlamentar është parti personale, por jo demokratike. Askush nuk duhet ti imponohet apo injorojë mendimin e Grupit Parlamentar, kjo është përdhosje e dinjitetit të çdo deputeti. Deputetët duhet të kenë të drejtë pa asnjë kompleks apo presion të bëjnë vlerësimin e tyre nëse një person i shpallur non grata nga SHBA duhet apo jo të jetë pjesë e grupit. Deri atëherë askush nuk mund të imponohet”
Kriza në PD pasqyrohet dhe në seli. Zyrat po i nënshtrohen ndryshimeve. be.k/abcnews.al
