Prokuroria e Posaçme (SPAK) ka dërguar për gjykim dosjen ndaj deputetit të Partisë Demokratike, Asllan Dogjani.
Ky i fundit akuzohet për fshehje dhe mos deklarim të pasurisë.
Gjyqtarja Rudina Palloj do të vendosë në seancë paraprake nëse do pranojë kërkesën e SPAK për të kaluar dosjen për gjykim ose jo.
“Prokuroria dyshon në lidhje me një apartament në kryeqytet, ku ka dyshime se nuk ka deklaruar mënyrën e blerjes dhe për këtë i ka kërkuar gjykatës që ta marrë të pandehur. Dogjani ka pretenduar se ky është veprim dashakeqës i pronarit të ndërtimit të pallatit por prokuroria ka provuar të kundërtën, ku ka dyshime se vlera monetare për këtë apartament nuk është treguar nga Dogjani.“, raportoi gazetari Ermal Vija.
Më herët, Dogjani ka deklaruar se ka qenë në SPAK për të trajtuar një rast të grabitjes së pronës publike në Tiranë, konkretisht për një pronë ku ai vetë banon.
Dogjani ka shpjeguar se një ndërtues kishte zaptuar një pronë publike dhe kishte legalizuar në mënyrë të jashtëligjshme një tokë që ishte planifikuar për një kopsht dhe lulishte.
Ai ka akuzuar se zaptuesi i pronës kishte lidhje familjare me një deputet dhe se ky i fundit kishte bërë kallëzim ndaj tij./abcnews.al
