I ftuar në ABC për të folur rreth luftës çlirimtare në Kosovë dhe gjykatës së Hagës, Sami Lushtaku, ish-komandant i UÇK-së ka komentuar edhe akuzat që janë bërë në Shqipëri në drejtim të kreut të Partisë Demokratike, Lulzim Basha.
Lushtaku u shpreh se mendon që politikanët shqiptarë duhet t’i lënë pas ato që ai i quajti marrëzira dhe të jenë më aktiv dhe më pranë Kosovës në këtë kohë, ndërsa ka falënderuar ish-deputetin e Partisë Demokratike Ervin Salianji, që ka gjetur kohen për të vizituar dhe për të qëndruar pranë në këto momente të vështira për ish-luftëtarët e UÇK.
Ish-komandanti i UÇK-së theksoi se ka pritur që politikanë apo një pjesë e institucioneve të qeverisë, të shkojnë në Kosovë, dhe të takohen me ta, por kjo nuk ka ndodhur.
Pjesë nga intervista
Linda Karadaku: Këtu në Shqipëri ka pasur disa akuza ndaj kreut të PD, Lulzim Basha për punën në UNMIK dhe në përpilimin e dosjeve të gjykatës së Hagës, keni një koment për këtë?
Sami Lushtaku: “Unë mendoj që politikanët shqiptarë duhet t’i lënë këto marrëzira dhe të jenë më aktivë dhe më afër nesh në Kosovë. Deri më tani asnjë politikan nuk ka ardh në Kosovë që ta bashkëndjejë këtë që i ka ndodh kryetarit të shtetit…Kam prit që një pjesë e institucioneve të qeverisë së Shqipërisë të vijnë në Kosovë, të takohet me ne, dhe deri më tani nuk ka ndodhur. Desha me falenderu, Ervin Salijanin që ishte në Kosovë, e kam prit unë, kemi shkuar tek Varrezat e Dëshmorëve tek kompleksi Adem Jashari. Dhe desha ta falënderoj që e ka gjetur kohen për të na vizituar, që ka ardh e na ka ngushëllu…” s.b/abcnews.al/
