Prokuroria e Tiranës ka përfunduar hetimet dhe ka çuar në gjykatë dosjen e Ajas Sulejmanit, i cili përplasi me makinë çiftin Konomi dhe foshnjen e tyre te vijat e bardha, te rruga e Kavajës në Tiranë, në fillim të muajit maj.
Sulejmani është hetuar nën masën e arrestit shtëpiak, ndërsa do të përballet me tre akuza, atë të shkeljes së rregullave të qarkullimit rrugor me pasojë plagosjen, drejtimi i mjetit në gjendje të dehur dhe largim nga vendi i aksidentit.
Ngjarja e rëndë ndodhi mesditën e 8 majit, ku 39-vjeçari ishte duke lëvizur me makinën e tij me shpejtësi, madje duke kaluar edhe semaforin me të kuqe duke përplasur familjen konomi që po kalonin tek vijat e bardha.
Lexoni KËTU gjithçka mbi aksidentin
Pasi shkaktoi aksidentin, ai braktisi mjetin dhe u largua, por 3 orë pas aksidentit, u arrestua ne një spital privat në Tiranë.
I riu pretendonte se ishte larguar nga vendi i ngjarjes pasi në makinë kishte vajzën e tij të traumatizuar dhe se kishte marrë lëndime.
Fillimisht Sulejmani u hetua nën masën e arrestit në burg, por për shkak të normalizimit të marrëdhënieve me familjen Konomi, gjykata vendosi ndaj tij arrest shtëpie.
/abcnews.al/
