Tre persona kanë mbetur të plagosur në një aksident mëngjesin e sotëm në Krujë. Ngjarja ka ndodhur pranë fshatit Kameras në aksin Krujë-Fushë Krujë, ku një makinë është përplasur nga pas me një tjetër mjet. Menjëherë në vendngjarje kanë mbërritur autoambulanca dhe efektivët e qarkullimit.
Tre të plagosurit kanë marrë ndihmën e parë në spitalin e Fushë-Krujës dhe më pas janë dërguar në spitalin e Traumës në Tiranë. Mësohet se ata janë jashtë rrezikut për jetën. Ndërkohë, grupi hetimor po punon për zbardhjen e plotë të rrethanave të aksidentit.
Njoftimi i policisë:
Rreth orës 07:35, në aksin “Krujë- Fushë Krujë”, automjeti me drejtues shtetasin D. Xh., 45 vjeç, ka përplasur automjetin me drejtues shtetasin D. H., 23 vjeç. Si pasojë e përplasjes, është dëmtuar shtetasi D. H., si dhe pasagjerët në automjetin që drejtonte 45-vjeçari, shtetasi H. Z., 26 vjeç dhe shtetasja P. Xh., 15 vjeçe.
Të dëmtuarit nga ky aksident po marrin ndihmë mjekësore dhe aktualisht janë jashtë rrezikut për jetën. Grupi hetimor po punon për sqarimin e rrethanave të këtij aksidenti./abcnews.al
