Një aksident i rëndë ka ndodhur mesditën e sotme, rreth orës 12:25 në rrugën Lezhë-Shëngjin, në vendin e quajtur ” Knalla”.
Një automjet ka dalë nga rruga dhe ka rënë në kanalin anësor.
Si pasojë e aksidentit ka ndërruar jetë drejtuesi i makinës, Armando Pacani 19 vjeç, informon policia.
Burime për Abc bëjnë me dije se pasagjeri i cili ndodhej në makinë është në gjendje të rëndë.
Shkak i aksidenti dyshohet se ka qenë shpejtësia në kthesë.
I riu mendohet se është mbytur për shkak se mjeti u kthye përmbys. Kalimtarë të rastësishëm kanë tentuar t’i japin ndihmën e parë duke i dërguar të rinjtë me urgjencë në spitalin rajonal të Lezhës, por 19 vjeçari nuk ka mundur të mbijetojë.
Grupi hetimor ndodhet në vendngjarje ku po kryen veprimet hetimore për zbardhjen e plotë të rrethanave të aksidentit.
Rruga që lidhet me Kunen ka dy kthesa të forta që janë bërë të rrezikshme dhe nuk mungojnë rastet e aksidenteve.
Aty këshillohet lëvizja me shpejtësi të ulët pasi kthesat janë rreth 75 gradë dhe janë burim aksidenti.
Ky segment është hapur si një mundësi për të shkurtuar lëvizjen e mjeteve të vizitorëve dhe pushuesve drejt zonës së Kunes./abcnews.al/
