Mesfushori francez Adrien Rabiot është prezantuar si futbollisti më i ri i skuadrës së Juventusit. 24 vjeçari shpreson të lërë gjurmë në aventurën e re.
Pasi kaloi me sukses testet mjekësore, Adrien Rabiot foli për herë të parë si juventin, ku u shfaq tepër entuziast për aventurën e re. Ish mesfushori i Paris Saint Germain mendon se ky ishte momenti i duhur për të kaluar te bardhezinjtë dhe shpreson të jetë nën gjurmet e futbollistëve e tjerë francezë që kanë bërë historinë me klubin torinez.
”Juventus më ka kërkuar edhe më parë, por nuk ka qenë momenti i duhur. Mendoj se ai moment është tani që unë jam këtu. Kam luajtur për 7 sezone në Francë dhe është hera e parë që do të luaj në një tjetër kampionat. Jam Ii emocionuar, do të jap më të mirën time për të ndihmuar skuadrën të arrijë objektivat sezonale. Me këtë klub e arrita shumë shpejt akordin. Juventus ka një histori të suksesshme. Këtu kanë luajtur shumë bashkëkombas të mi dhe kanë shkruajtur historinë me këtë skuadër. Shpresoj që edhe unë të lë gjurmë këtu”.
24 vjeçari ka firmosur për katër sezone me Juventusin ku do të përfitojë 7 mln euro në sezon. Futbollisti francez zbulon se Buffon e bindi për të kaluar te Juventus, ndërkohë që e cilësoi skuadrën kampione të Italisë si një shkallë më lart se Paris Saint Germain.
“Buffon më ka bindur që unë të luaja për skuadren e Juventusit. Më ka dhënë shumë këshilla gjatë sezonit të kaluar. Më tha me bindje se nëse kërkon të bësh hapa përpara në karrierë duhet të firmosësh për Juventusin. Fjalët e Buffon ndikuan në vendimin tim dhe pranove ofertën e Juventusit. Buffonin e kam shumë mik dhe më bindi lehtësisht. Me trajnerin Sari nuk kam biseduar, por shpresoj të shkojë çdo gjë mirë. Jam i priviligjuar që do të luajë me Cristiano Ronaldon. Është një lojtar i madh që ka bërë historinë kudo që ka luajtuar, por nuk është vetëm portugezi në skuadër. Ka edhe lojtarë të tjerë shumë të mirë që bëjnë diferencën. Jam i bindur se Juventus është një shkallë më lart se skuadra e Paris Saint Germain, përfundon fjalën e tij futbollisti më i ri i Juventusit, Adrien Rabiot”.
Mesfushori francez kaloi tek Juventus me parametra zero, pasi i skadoi kontrata me skuadrën e Paris Saint Germain. Një perforcim mjaft i rëndësishëm për kampionet e Italisë që nënshkruajnë me një tjetër futbollist me zero kosto pas Ramsej. /ABc News Albania 24/7
