A mund të shkojë Trump në burg dhe pyetje kyçe

Ish-presidenti i SHBA-së, Donald Trump është paditur në lidhje me ngjarjet rreth trazirave të 6 janarit 2021 në Kapitol, SHBA.

Politikani republikan mohon dhunën dhe e ka përshkruar rastin si “qesharak”.

Ai tashmë është akuzuar në dy raste të tjera – për keqpërdorimin e dosjeve të klasifikuara dhe falsifikimin e të dhënave të biznesit për të mbuluar një pagesë të heshtur ndaj një ylli porno.

Këtu janë disa nga pyetjet kryesore që lidhen me rastin.

Çfarë po ndodh sot në daljen e Trump në gjykatë?

Trump do të paraqitet në një gjykatë federale në Uashington DC në orën 16:00 me orën lokale (20:00 GMT) përpara gjykatësit të magjistraturës Moxila Upadhyaya.

Ai pritet të deklarohet i pafajshëm.

Edhe pse ai ka mundësinë të shfaqet nga distanca përmes videove, ish presidenti do të marrë pjesë personalisht. Ai e kaloi të mërkurën në klubin e tij të golfit në Bedminster, New Jersey.

Po gjyqi?

Njeriu që drejton hetimin, këshilltari i posaçëm Jack Smith, po zotohet të kërkojë një “gjykim të shpejtë”, por nuk është aspak e sigurt se kjo do të ndodhë. Avokatët e Trump janë rezistent, duke thënë se do t’u duhet kohë për të organizuar mbrojtjen e klientit të tyre.

Gjithashtu, gjyqi do të jetë në garë për kohë me çështjet e tjera ndaj tij dhe nuk ka gjasa të zhvillohet në momente kyçe të zgjedhjeve.

Pra, mbetet mundësia që zoti Trump mund të ishte zgjedhur tashmë president në kohën kur fillon gjyqi.

Cilat janë akuzat ndaj Trump?

Trump, i cili humbi zgjedhjet presidenciale të vitit 2020 nga demokrati Joe Biden, është akuzuar për komplot për të përmbysur humbjen e tij.

Ai akuzohet për katër pika:

1- komplot për të mashtruar SHBA-në

2- komplot për të penguar një procedurë zyrtare

3- pengimi i një procedimi zyrtar

4- komplot kundër të drejtave të qytetarëve

Këto akuza lidhen me veprimet e zotit Trump gjatë një periudhe prej më shumë se dy muajsh, menjëherë pas ditës së zgjedhjeve (3 nëntor) deri në ditën kur ai u largua nga Shtëpia e Bardhë më 20 janar.

Çfarë bëri dhe tha Trump?

Ndërsa votat u numëruan pas zgjedhjeve, shpejt u bë e qartë se zoti Trump nuk ishte i përgatitur të pranonte se kishte humbur.

Sipas aktakuzës, ai gënjeu dhe u bëri jehonë pretendimeve të rreme për mashtrim zgjedhor për muaj të tërë, pavarësisht se i ishte thënë nga zëvendëspresidenti Mike Pence dhe zyrtarë të tjerë të lartë se ato nuk ishin të vërteta.

Ka të ngjarë që avokatët e ish-presidentit të argumentojnë se ai ka të drejtë sipas Amendamentit të Parë të Kushtetutës së SHBA për të shprehur pikëpamjet e tij, edhe nëse ato përfshijnë pretendime të rreme.

Këto pikëpamje u shprehën në mëngjesin e 6 janarit 2021 nga zoti Trump në një postim në Twitter përpara një tubimi të mbështetësve të tij në Uashington DC.

Më vonë, në tubim, ai u kërkoi mbështetësve të mblidhen në Kapitol për të “bërë zërin tuaj të dëgjohet” dhe “luftoni si ferr” ndërsa Kongresi po mblidhej.

Ajo që pasoi u bë e njohur si trazirat e Kapitolit, pasi një turmë mbështetësish të Trump sulmuan dhunshëm ndërtesën e Kongresit, duke detyruar ligjvënësit të evakuoheshin dhe duke vonuar procedurat.

Trump shkroi në Twitter atë pasdite duke u bërë thirrje rebelëve të qëndrojnë paqësorë dhe të respektojnë ligjin.

Por më vonë ai i vlerësoi demonstruesit si “patriotët e mëdhenj”.

Cili është roli i Mike Pence në këtë aferë?

Zëvendëspresidenti i SHBA-së është gjithashtu president i Senatit dhe ka një rol kryesisht ceremonial që përfshin certifikimin përfundimtar të rezultateve të zgjedhjeve.

Trump i bëri presion publikisht Pence për të penguar këtë certifikim. Pence refuzoi dhe pohon se nuk kishte të drejtë të përmbyste zgjedhjet.

Që atëherë ai e ka akuzuar Trumpin se e ka rrezikuar atë dhe familjen e tij, si dhe të tjerët në Kapitol, të cilët u kërcënuan nga rebelët.

Kush janë bashkëpunëtorët e Trump?

Aktakuza përmend gjashtë bashkëpunëtorë, duke përfshirë një zyrtar të Departamentit të Drejtësisë, katër avokatë dhe një konsulent politik. Asnjëri prej tyre nuk përmendet pasi nuk janë akuzuar për një krim.

Megjithatë, citate, anekdota dhe kontekste të tjera në akuzat e dokumenteve dhe hetimet e mëparshme kanë lejuar që pesë prej tyre të identifikohen.

Ata janë ish-avokatët e Trump-it, Rudy Giuliani, John Eastman dhe Sidney Powell, zyrtari i Departamentit të Drejtësisë, Jeffrey Clark dhe avokati pro-Trump, Kenneth Chesebro.

Identiteti i bashkëpunëtorit të gjashtë, një konsulent politik, mbetet i paqartë.

A mund të shkojë Trump në burg dhe të kandidojë për president?

Ish-presidenti, në moshën 77-vjeçare, po përballet me mundësinë e një dënimi të ashpër me burg nëse shpallet fajtor. Trump po përballet gjithashtu me dënime me burg deri në 20 vjet në rastin e dokumenteve të klasifikuara.

Sipas ligjit amerikan, asgjë nuk e pengon një individ të kandidojë për post nëse përballet me akuza penale, apo edhe nëse është në burg. Sigurisht, kjo nuk do të thotë se votuesit do të dëshironin të mbështesin një kandidat të tillë.

Të paktën dy persona kanë kandiduar më parë për president me dënime penale – kandidati socialist Eugene Debs në 1920, i dënuar për një fjalim kundër luftës në 1918; dhe konspiracisti Lyndon LaRouche, i dënuar për mashtrim, një nga tetë kandidimet e të cilit për president në 1992 ishte nga një burg federal në Minesota. Të dy humbën zgjedhjet./abcnews.al