Teksa tha se Franca rreshtohet krah SHBA në çështjen e shpalljes “non grata” të Sali Berishës, ambasadorja franceze në Tiranë, Elisbeth Barsacq, ka folur edhe për procesin gjyqësor që ish-kryeministri ka hapur në një gjykatë në Francë kundër Anthony Blinken.
E pyetur nga gazetari Endri Xhafo, i emisionit “Log.” se në çfarë faze është procedura e Berishës në Francë, ambasadorja Elisbeth Barsacq u shpreh se duhet një konfirmim nga vetë gjykata.
Sa i përket konkretisht Francës si shtet, zonja Barsacq u shpreh se Franca vëzhgon dhe më pas del në konstatime konkretet për persona të përveçëm.
Pjesë nga intervista:
Endri XHAFO – A mundet, në aspektin formal, që sistemi gjyqësor francez të ndajë, të jap vendim, në Francë, për një çështje që implikon një politikan shqiptar kundër Sekretarit amerikan të Shtetit?
Elisabeth BARSACQ – Ah, këtu më vjen sinqerisht keq. Nga momenti që ka një procedurë gjyqësore, një përfaqësues i qeverisë franceze, pra i ekzekutivit, nuk mund të shprehet. Nuk mund t’ju them asgjë në këtë pikë. Në momentin që ka një procedurë në zhvillim e sipër nuk mund të them asgjë, do të ishte kundër parimit të ndarjes së pushteteve që është përcaktuar nga zoti Montesquieu në shek.XVIII, e që ne përpiqemi ta respektojmë.
Endri XHAFO – (Qesh) Pyetja e fundit: A keni ju informacione se në ç’fazë është kjo procedurë me zotin Berisha në Francë?
Elisabeth BARSACQ – Edhe këtu do të duhet t’i drejtoheni gjykatës.
Endri XHAFO – Gjykatës korrksionale të Parisit. Ju faleminderit zonja ambasadore.
Elisabeth BARSACQ – (shqip) Shumë faleminderit edhe juve. /abcnews.al/
