Presidenti amerikan Donald Tramp i ka dërguar një letër presidentit të Kosovës Hashim Thaçi, letër që ky i fundit e ka publikuar në faqen e tij në Facebook. Në këtë letër Tramp u kërkon liderëve politikë në Kosovë që të kenë unitet në arritjen e një marrëveshjeje gjithëpërfshirëse me Serbinë. Sipas tij kjo marrëveshje është një mundësi për Kosovën dhe humbja e saj do të ishte kthim mbrapa për një kohë të gjatë.
Kreu i Shtëpisë së Bardhë i bën apel politikës kosovare që të shfrytëzojë këtë moment unik duke folur me një zë të vetëm gjatë negociatave për paqe, dhe të përmbahen nga veprimet të cilat mund ta vështirësojnë arritjen e marrëveshjes.
Shtetet e Bashkuara kanë investuar shumë për suksesin e Kosovës, si një shtet i pavarur dhe sovran. Unë pres që në Shtëpinë e Bardhë t’ ju mirëpres Ju dhe Presidentin Aleksander Vuçiç, për të festuar atë që do jetë një marrëveshje historike- përfundon letra e presidentit amerikan Trump. /abcnews.al
