Një tjetër super jaht “Flying Fox” është ankoruar në Sarandë, ku krahas rrezeve të diellit që do të marrin personat në bord, do të furnizohet me karburant të lirë pa akcizë. Jahti gjigant “Flying Fox” është parë mëngjesin e sotëm në gjirin e Sarandës ku edhe ka hasur probleme me ankorimin për shkak të zonës së kufizuar.
Së fundmi në një komunikatë për ABC, Alket Qendro, drejtori i Portit të Sarandës ka thënë se jahti në fjalë funksionon me qira për personat që dëshirojnë ta marrin. Në bord momentalisht ka vetëm ekuipazhin. Ata kanë kërkuar të ankorohen për 3 ditë në mënyrë që të furnizohen me karburant. Pasi u furnizuan kanë lëvizur ndërsa pritet që të kthehet sërish për tu furnizuar plotësisht me karburant.
Mbi jaht është edhe helikopteri ku personat mund të hipin për të shijuar bregdetin shqiptar. Jahti “Flying Fox” konsiderohet si një ndër më të mëdhenjtë dhe luksozët në botë. Me 136 metra gjatësi dhe 22.5 metra gjerësi, “Flying Fox” mund të mbajë 22 të ftuar VIP, ku secili ka dhomën e vet.
Jahti ka motorë super të fuqishëm të cilët harxhojnë 250 litra karburant për një orë lundrim. Depozita e tij e naftës konfirmon edhe më tepër shkakun e vizitës në Sarandë. Bëhet fjalë për 682 000 litra karburant, të cilat nëse do të mbusheshin në ndonjë shtet tjetër mund të nevojiteshin 650-700 mijë euro, kurse në Shqipëri, me heqjen e akcizë së karburantit për jahtet, i duhet të paguajë rreth 430 mijë euro. /abcnews.al/
