Presidenti Ilir Meta këtë të shtunë ka zhvilluar një takim me ambasadoren e Holandës në Tiranë, Guusje Korthals Altes.
Meta përmes një postimi në rrjetin social thekson se në përfundim të misionit të saj e ka vlerësuar kontributin e Ambasadores në forcimin e marrëdhënieve dypalëshe, ndërsa e falenderoi atë për mbështetjen e Holandës për procesin e integrimit europian të Shqipërisë.
“Pata kënaqësinë të takohesha sot me Ambasadoren e Holandës në Tiranë, SH.S.Znj. Guusje Korthals Altes, me rastin e përfundimit të misionit të saj diplomatik në vendin tonë.
Vlerësova kontributin e Ambasadores në forcimin e marrëdhënieve dypalëshe, nënvizova nivelin shumë të mirë të tyre dhe rëndësinë e forcimit më tej në dobi të dy vendeve tona veçanërisht në fushën e shkëmbimeve ekonomike dhe investimeve të huaja, ku Holanda zë një vend të rëndësishëm dhe në rritje.
Falënderova për mbështetjen e Holandës për procesin e integrimit europian të Shqipërisë, në veçanti për qëndrimin inkurajues të Parlamentit holandez për mbajtjen e Konferencës së Parë Ndërqeveritare me Shqipërinë.
E falënderova Ambasadoren për ndihmën e Holandës, si për rindërtimin e zonave të prekura nga tërmeti i vitit 2019, ashtu edhe për ndihmën e vyer në përballimin e pasojave të COVID-19 në Shqipëri, nëpërmjet programit “UNICEF Albania””, shkruan Meta./abcnews.al
