Presidentja e Kosovës, Vjosa Osmani, këtë të martë ka vendosur që të vijojë sërish mandatin e misionit evropian për sundimin e ligjit – EULEX edhe për një vit.
Presidenca përmes një njoftimi për mediat bën me dije se presidentja Osmani e njoftoi shefin e politikës së jashtme të Bashkimit Evropian, Josep Borrell, në lidhje me vendimin.
Në letrën drejtuar atij, Osmani tha se EULEX-i “do të jetë me mandat teknik, pa fuqi ekzekutive dhe i bazuar vetëm në monitorim, mentorim dhe këshillëdhënie”.
“I njëjti mandat mund të vazhdohet edhe për një vit tjetër, në rast të vlerësimit pozitiv të punës së këtij misioni nga presidentja e Republikës së Kosovës”, thuhet në letër.
Mandati i tij mbaronte këtë muaj. Ndërkohë kujtojmë se EULEX është vendosur në Kosovë në vitin 2008, pasi Kosova ka shpallur pavarësinë. Ai ka përbërë misionin më të madh civil në kuadër të politikës së përbashkët të Bashkimit Evropian për siguri dhe mbrojtje.
Në fazën e hershme, qëllim i tij ishte t’i ndihmonte autoritetet e Kosovës në ngritjen e institucioneve të qëndrueshme dhe të pavarura të sundimit të ligjit.
Shumica e kompetencave të drejtësisë që ka pasur administrata e Kombeve të Bashkuara në Kosovë – UNMIK, i kanë kaluar EULEX-it.
Por, nga viti 2018, edhe kompetencat dhe përgjegjësitë e EULEX-it janë reduktuar në masë të madhe, duke i kaluar sistemit vendor. Pjesëtarët e EULEX-it gëzojnë imunitet ndaj proceseve ligjore dhe administrative të Kosovës.
Për vazhdimin e mandatit të këtij misioni kërkohet marrëveshje ndërmjet Kosovës dhe BE-së./abcnews.al
