Barcelona u mposht nga Granada, që në 25 ndeshje me katalanasit mori për herë të parë fitore në “Camp Nou”. Trajneri Ronald Koeman u ndëshkua me karton të kuq në këtë ndeshje dhe në fund ai foli për mediat edhe në lidhje me atë që ndodhi.
“Nuk e kuptoj aspak atë vendim. Unë nuk thashë asgjë, nuk e sulmova atë. Fola me gjyqtarin e katërt dhe ai tregoi mungesë respekti ndaj meje. Nuk isha aspak gabim. Arbitri ka shënuar në raport se nuk kam respektuar arbitrin e katërt.
Nuk është ashtu. Mungesa e respektit është fyese. Unë nuk kam përdorur fjalë fyese. Nëse ata vendosin në raport gjëra që nuk i thënë, atëherë do të duhet të bëj diçka. Nuk e kuptoj të gjithën”, është shprehur Koeman, i cili më pas ka nisur të flasë për ndeshjen.
“Duhet ta pranojmë humbjen e pësuar. Është shumë e vështirë në fakt, pasi ishte një mundësi e mirë të fitonim. Humbja erdhi për shkak të mungesës së përqendrimit në mbrojtje tek të dy golat e Granada. Është një rezultat shumë zhgënjyes.
Ishte një humbje e rëndë, pasi ne e kontrolluam lojën. Tani kanë mbetur edhe pesë ndeshje deri në fund të kampionatit. Fola me disa prej lojtarëve pas ndeshjes dhe ata janë shumë të zhgënjyer.
Është shumë e rëndësishme të fitojmë përsëri, pasi ndeshja e së dielës është e rëndësishme për objektivin tonë që të fitojmë kampionatin. Ne duhet të mësojmë nga gabimet, duhet të vëmë energjitë në zbatim dhe të përmirësohemi e të vazhdojmë tutje”. /abcnews.al
