Nga Erblina Mile
Planifikimi jo-realist ka detyruar qeverinë që të rishikojë përsëri buxhetin e shtetit për vitin 2021.Vetëm 10 ditë para zgjedhjeve të ardhurat në arkën e shtetit kanë ndryshuar duke shtuar fondet për pandeminë dhe zgjedhjet.
Me anë të një akti normativ i cili është botuar në fletoren zyrtare ka pasur rritje të fondit rezervë me 2 mld lekë duke arritur në 7 mld lekë .Ky fond do përdoret 6 mld për raste të paparashikuara të qeverisjes qendrore .
Ndër të tjera qeveria ka parashikuar të shtojë fondet për përballimin e kostos së zgjedhjeve të 25 prillit, në masën 1 mld lekë.
Sipas aktit normativ fillestar parashikimet janë për një rritje me 1.1 % të ardhurave. Nga 484 mld lekë të planifikuara në fillim të buxhetit të shtetit me rishikimin e fundit pritshmëritë janë rritur në 489 mld lekë ose rreth 44 mln euro më shumë e planifikimi fillestar.
Kjo rritje e të ardhurave pritet të vij nga TVSH e cila ka pasur një performancë pozitive me të paktën 2.3% që në tre mujorin e parë.
Sipas treguesve fiskal të ministrisë së financave të ardhurat për periudhën janar-mars ishin rreth 4.4 mld lekë më të larta se ato të vitit 2020.Kjo tregon se ekonomia po jep shenja të rigjallërimit pas pandemisë edhe pse janë vetëm muajt e parë./abcnews.al
