Real Madrid është gati për duelin me Liverpool. Dy skuadrat do të përballen për herë të dytë nesër në mbrëmje në “Anfield”. Ekipi spanjoll fitoi 3-1 takimin e parë dhe është më pranë kalimit në katër më të mirët e Champions League.
Pavarësisht fitores në Madrid, Zinedine Zidane thekson në konferencën për shtypin se Reali i tij do të tentojë një tjetër fitore në Angli. Kampionët e Spanjës duan kualifikimin në gjysmëfinale dhe janë gati të zhvillojnë një tjetër ndeshje të madhe kundër “The Reds”.
“E dimë që do ta hasim vështirësi nesër, por ne do të vazhdojmë të luajmë ashtu siç po bëjmë deri tani. Do të mbrohemi mirë dhe do të tentojmë të imponojmë lojën tonë. Kemi ardhur në Angli për fitore, do e synojmë atë pa e mbajtur mendjen te menaxhimi i energjive.
Ndeshja e parë dhe El Clasico na kanë lodhur, kemi shpenzuar shumë energji, por tashmë jemi mësuar. Skuadra ime bashkohet gjithmonë në momente vështirësie, shfaq karakterin e saj, kështu që jemi gati të përballemi me Liverpool për të kaluar në raundin tjetër.
Valverde? Fede është rikuperuar dhe do të jetë i gatshëm për ndeshjen e nesërme. Klopp i përshtatshëm për të drejtuar Realin? Nuk ja kam idenë, trajneri jam unë për momentin, ai drejton Liverpool“, deklaroi francezi i “Los Blancos”. /abcnews.al
