Presidenti i Koresë së Jugut ka mbërritur sot në Phenian për një samit treditor me udhëheqësin komunist të Veriut. Ky është takimi i tretë mes dy liderëve të dy Koreve.
Lideri koreanoverior Kim Jong-un priti sëbashku me zonjën e parë Ri Sol-ju në shkallët e avionit presidencial koreanojugor, homologun e tij të Koresë së Jugut Moon Jae-in me bashkëshorten e tij. Pamjet e transmetuara nga mediat e Seul dhe ato ndërkombëtare tregonin përqafime të ngrohta mes dy çifteve.
Presidenti koreanojugor ndodhet në Phenian për një samit treditor me liderin koreanoverior. Ky i sotmi është takimi i tretë brenda vitit mes dy liderëve dhe do të shërbejë për të vazhduar negociatat që duhet të çojnë të dyja vendet, ende në luftë, drejt firmosjes së një traktati për paqen. Një tjetër temë e rëndësishme, sipas mediave mund të jetë dhe plani për asgjësimin e armëve bërthamore të Koresë së Veriut.
Në pistën e aeroportit të sapo rinovuar të Phenian, përveç turmës së sistemuar për raste të tilla, me në duarlule plastike, flamuj të Koresë së Veriut dhe Koresë së bashkuar, ishte një surprizë prania e liderit koreanoverior. Aq më tepër në shoqërinë e bashkëshortes së tij e cila shumë rrallë del në publik.
Në tapetin e kuq ndodheshin dhe funksionarë të lartë si dhe ushtarakë koreanoveriorë për t’i uruar mirë se ardhjen tradicionale miqve të shquar. Pas prezantimit dhe dorëzimit të dhuratave simbolike të dy liderët i janë drejtuar automjeteve të tyre./abcnews.al
