Nga Xhensila Kodra
Dyfishohen gjobat për shoferët që shkelin Kodin Rrugor, e që bëhen burime aksidenti.
Ashpërsim të masës administrative do të ketë për personat që lëvizin në gjendje të dehur. Gjoba shkon deri në 15 mijë lekë të reja. Kur kalohet masa 0.5 gram për litër drejtuesi i mjetit dërgohet për procedim penal, ndërsa kur shkaktohet aksident dhe fajtor është shoferi i dehur, makina bllokohet për dy muaj.
Por deri në 15 mijë lekë të reja do të gjobiten edhe drejtuesit e mjeteve që përdorin celularin në timon. Nëse shoferi kapet 3 herë me celular brenda vitit, patenta i pezullohet për 3 muaj.
Në shumë raste, parakalimi i gabuar dhe shpejtësia tej normave të lejuara kanë qenë burim aksidenti në shumë ngjarje rrugore. Gjoba për parakalim shkon deri në 10 mijë lekë. Për tejkalim shpejtësie nga 30-50 km/h bëhet 15 mijë lekë dhe kush udhëton në qendrat e banuara mbi shpejtësinë e e lejuara 40 km/h, do të ndëshkohet me 20 mijë lekë të reja.
Kush lëviz në sens të kundërt gjoba rritet nga 4 mijë në 10 mijë, ulet koha e bllokimit të patentës nga 6 në 3 muaj, si dhe është shtuar zbritja e pikëve të saj.
Ndryshim në ligj ka edhe për personat që qarkullojnë pa patentë. Ai do të gjobitet deri në 40 mijë lekë, ndërsa më herët parashikohej burg deri në 30 ditë. Ndërsa për qytetarët që udhëtojnë me makina me targa të huaja e që më herët ishte gjobë 20 mijë lekë, tashmë kush udhëton me të pas një viti i konfiskohet mjeti.
Përgjegjësia mbi shoferin do të bjerë edhe nëse pasagjerët nuk vendosin rripin e sigurimit. Në këtë rast shoferi gjobitet deri në 3 mijë lekë. Po këtë gjobë do të marrin edhe shoferët e motorave në rastet kur nuk kanë vendosur kaskat mbrojtëse. Po ashtu, ata do të jenë të detyruar që gjatë qarkullimit të kenë të veshur jelek fosforeshent.
Projektligji për këto ndryshime është dorëzuar në Parlament dhe pritet që të kalojë për miratim.
DREJTIM MJETI NE GJENDJE TE DEHUR
Bëhet: 5-15 mijë lekë
Ishte: 2500-10 mijë lekë
PERDORIMI I CELULARIT
Bëhet: 5-15 mijë lekë
Ishte: 500-1500 lekë
PARAKALIMI I GABUAR
Bëhet: 5-10 mijë lekë
Ishte: 5-2 mijë lekë
MOS VENDOSJA E KASKES MBROJTESE
Bëhet: 1-3 mijë lekë
Ishte: 500-1500 lekë
/mv.abcnews.al
