Joan Laporta është prezent në media dhe nuk ngurron të flasë për qëndrimin e Messit te Barcelona. Disa ditë më parë ai lëshoi një deklaratë të fortë, duke theksuar se argjentinasi do të largohet nëse vetë Laporta nuk zgjidhet president i katalanasve. Kandidati për president ka folur edhe për trajnerin Ronald Koeman, për të cilin flet vetëm fjalë të mira.
“Propozimi që do i bëjmë Messit do të shikohet me vullnetin për ta pranuar. Ofertat ekonomike të klubeve shtetërore janë shumë të rëndësishme. Gjëja më e mirë për Messin është të qëndrojë. Ju e dini se si do të ishin marrëdhëniet tona dhe si do ta drejtoj klubin. Lojtarët e dinë që ditën që do largohen do e bëjnë nga dera e përparme, sikurse duhet.
Messi mund të largohet kur të dojë, për fat të keq, pasi kontrata i mbaron. Unë do të bëj të gjitha propozimet, për aq sa është e mundur financiarisht, për të vazhduar me ne. Ai dëshiron titujt dhe unë do mundohem t’i tregoj dashuri”, është shprehur Laporta për “El matí de Catalunya Ràdio”, ndërkohë që më pas ka vlerësuar edhe punën e bërë nga trajneri Ronald Koeman.
“Kemi një trajner që po bën më të mirën. Ka shumë virtyte dhe një prej tyre është se i thotë gjërat ballë për ballë. Kam shumë respekt për Koeman, ai është një njeri me të cilin mund të diskutosh dhe është i disiplinuar. Dua që të shkojë mirë, por çdo trajner varet nga rezultatet”, ka deklaruar mes të tjerash Laporta. /abcnews.al
